11/5/10

Finó Tolo d'Asturies 2010

Esti añu la edición de Tolo d'Asturies foi un éxitu total d'asistencia y participación por parte de la xente que se averó poles carpes de la estación d'autobuses y pol Nuevu Teatru de La Felguera. La verdá ye que nes ediciones pasaes hebo xente, pero esti ye con diferencia el añu con más númberu d'asistentes. La fórmula de conciertín tranquilu de vienres nel teatru y día grande de sábadu paez que funciona, xunto cola solera y tradición que va garrando el festival, ensin escaecer que casi tolos años se vieron actuaciones inédites n'Asturies. Préstanos asgaya que la xente disfrute y sofite la fiesta de l'asturianía llangreana.

Alcordavos que podeis ver semeyes de Tolo d'Asturies na gallería Flickr de Reija.

Hasta otru añu.

8/5/10

El conciertu de Mapi Quintana y Espido

Fai un par d'hores que terminó el conciertu que dieron Mapi Quintana y Spido nel nuevu teatru de La Felguera. Foi un d'esos conciertos intimistas que respiguen el peyeyu a más d'ún. Música de calidá, non comercial y de raigañu.

Dos formaciones altamente recomendables que dieron lo meyor de sí na xornada del vienres del festival Tolo d'Asturies. Mañana sábadu, a partir de les 21h. na carpa de la estación d'autobuses vamos poder disfrutar del día grande de Tolo d'Asturies con un conciertu inéditu na programación musical asturiana.


Como siempres, toles semeyes del festival van poder vese en: http://www.flickr.com/photos/reija/

3/5/10

Cartelu Tolo d'Asturies 2010

Ya ta na cai el cartafueyu tipu trípticu y el cartelu oficial de la edición Tolo d'Asturies 2010. Afítase el programa que habíamos anunciao va tiempu, cuando namás queden tres díes pa qu'entame esta folixa cultural d'asturianía. Esti xueves 6 de mayu va ser la inauguración oficial na Casa los Alberti de Ciañu a les 19:30 h., terminando el domingu a les 19:00 h. col homenaxe a la gaita asturiana, presentando un espectáculu inéditu, diseñáu a costa fecha pa Tolo d'Asturies 2010.
Vémonos a partir d'esti xueves en Llangréu pa disfrutar de hores y hores de música tradicional internacional, puestos d'artesanía y gastronomía, feria del llibru y del discu n'asturianu y folixa nes carpes asitiaes na estación d'autobuses de Llangréu. Asistir ye una bona forma de sofitar la cultura d'Asturies y promoviendo que los conceyos nun dexen de programar actividaes como estes.