30/12/17

SONES NAVIDIEGOS





La nueche del vienres foi especial. La xuntanza colos cantares de navidá na tradición asturiana fixo que Grau resonara cola música de villancicos y aguilandos. 


Dempués de díes y selmanes de la invasión de “Burritos Sabaneros” y similares, ye d'estimar el poder participar nun eventu qu'amuesa qu'en la nuesa tradición, cuntamos con un gran repertoriu de sintoníes qu'acompañen estos díes ensin necesidá de recurrir, y ensin ánimu d'ofender, a la esclusividá foriata.


Aplaudimos  la iniciativa del Arquivu de la Tradición Oral d’Ambás y del Conceyu de Grau y esperamos siguir participando en siguientes ocasiones, y que supla l'exemplu en favor de la cultura navidiega tradicional asturiana.



25/6/17

SAN XUAN 2017





Dempués de dos años d'ausencia volvimos cumplir con una tradición que se repite cada nueche de San Xuán dende fai casi trenta años, participar y danciar na foguera del Barriu Urquijo en La Felguera.




Como n'otres ocasiones estimamos a los vecinos del barriu'l bon acoyimientu que siempres nos dan y el poder esfrutar d'una foguera senciella, tradicional y tan esviada d'esti enclín obsesivu pol camión d'orquesta que s'empeña n'apostrar la tradición del fueu sanxuanero a un segundu planu.





Esperamos siguir con esta tradición añu tres d'añu por otros trenta como pocu. 

Semeyes y video: Ambás




25/2/17

PREMIU VERDES VALLES MINEROS ASTURIANOS 2016



Ayeri, la nuesa agrupación foi galardonada col Premiu de la Fundación Marino Gutiérrez Suárez 2016 na so categoría “Verdes Valles Mineros Asturianos”. El llabor lleváu a cabu pol grupu a lo llargo de 62 años de vida en favor de la cultura, la música y la llingua asturiana fueron los nuesos principales avales.

Pudimos compartir la esperiencia col restu de galardonaos no que foi un eventu cargáu d'emotividá y satisfaición. La claridá d'idees d'una mocedá qu'opta pola formación cultural, representada nes galardonaes colos premios de redacción Elena Marcos y Elisa Palacios. La humildá del premiáu a la “Creación, Promoción y Desarrollo” Juan M. Gonzalez Uriarte. El nuedu nel pechu que se formó a toos ante'l llabor altruista del merecíu premiu a los “Valores Humanos”, Emma Susacasa. La cordialidá y el ciñu amosáu polos galardonaos cola “Insinia d'Oru” y el “Premiu Especial de La Fundación” recayíos n'Adolfo Barthe Aza y Carlos López Otín, que colos sos discursos cautivaron a los presentes.

Dende Reija queremos dar les gracies a La Fundación Marino Gutiérrez Suárez, al Xuráu y a la Presidenta de La Fundación Doña Sagrario Fernández Ariznavarreta, el tener a bien la concesión d'esti premiu que nos enllena d'arguyu.

Per otru llau, queremos faer estensibles les nueses gracies a Rosi Roces por presentar la nuesa candidatura, y a ella y la so familia, el sofitu y ciñu que siempres recibimos pela so parte, tantu en vida de Rufino como hasta'l momentu actual.

Dedicamos esti premiu a Maite Gutiérrez Olay  por empezar el llabor en 1955 y apurrir el so tiempu al grupu nes siguientes décades, a toa esa xente que trabayó, en dalgún momentu de la nuesa historia, por siguir alantre, a Reija, que al igual qu'otros  dexonos cuando entá nun yera'l so tiempu, a tolos qu'a día de güei formen parte d'esta familia que lleva'l so nome y de dalguna manera, a tolos que trabayen y lluchen pol bien de la música, la cultura y la llingua asturiana.

Munches gracies.


A.E.F. Reija de Llangréu



6/9/16

EL CARBAYU 2016




Un añu mas vamos tar n'El Carbayu el día 8 participando como siempres nes celebraciones de la mañana y convidando a toos a baillar con nós tola tarde na romería. 

Una bona ocasión pa esfrutar del baille tradicional de manera activa.

Ellí vamos tar. Pela tarde anímate a baillar a lo suelto con nós. Puedes mirar pero tamién puedes baillar. 

Nun mires y bailla



15/3/16

A SEGUIR BAILLANDO



Y pasó como un aliendu. Munchos ensayos, muncha entrega nos últimos meses, pero mereció la pena. Cola amuesa del pasáu sábadu “60 AÑOS XUNTOS” punximos broche a les celebraciones del nuesu sesenta aniversariu que yá empezamos nel añu 2015. Esperamos que la mesma fora del agradu de los presentes na mesma, pos a nós, dexónos bon sabor de boca.

Cola presente amuesa, tratamos de ofrecer un repertoriu de bailles, dances y cantares tradicionales asturianos d'una manera amplia, tal como venimos faciendo nes distintes amueses y festivales nos que participamos fora d'Asturies y que en poques ocasiones pudimos presentar en Llangréu.

Asi empezamos col cantar qu'acompaña al Ramu de mantega d'ufrienda a La Madalena y bailles del suroccidente, incorporaos al nuesu repertoriu nos años noventa, con pieces de les comarques vaqueires adoptaos nos años ochenta, con un Pericote d'una sola triada coles evoluciones del baille como venimos faciendo dende los años sesenta, con bailles a lo suelto de romería al usu de siempre y con xiraldilles, alreores y otros que fueron quedándose con nós a lo llargo d’estos sesenta años.


Damos les gracies a tolos que nos acompañaron esi día y a tolos que d'una o otra manera, formaron parte de la nuesa andadura a lo llargo d'estos sesenta años. Esperamos siguir pasando'l testigu a los que tean por venir y siguir trabayando pola nuesa cultura, que nun ye cultura del pasáu, si non de presente y futuru.






3/3/16

MUESTRA DE FOLCLOR "60 AÑOS XUNTOS"


60 años baillando, 60 años xuntos. A lo llargo de la nuesa hestoria, llevemos el nome de Llangréu onde quiera que representáramos les nueses amueses llueñe de casa, y el 12 de marzu queremos ufiertar a Llangréu, una escoyeta del nuesu repertoriu que pudo vese fora en numberoses ocasiones, y que equí casi siempres se ve de manera más amenorgada. La entrada ye llibre. 
Allí vos esperamos


2/9/15

ENTAMANDO SETIEMBRE



Yá tamos acabando los preparativos pa participar en “XXVI CERTAMEN DE DANZA Y PALOTEO” de San Pedro de Gaillos en Segovia, el próximu sábadu 5. Vamos Participar como grupu invitáu. Pa tal ocasión preparemos una amuesa con gran variedá de xotes, xiraldilles, dances y bailles que faen un ampliu percorríu pol folclore tradicional.



Y como siempres vamos tar n'El Carbayu el día 8 participando activamente nes celebraciones de la mañana y convidando a toos a baillar con nós tola tarde na romería. Una bona ocasión pa esfrutar del baille tradicional de manera activa.


60 AÑOS XUNTOS



18/8/15

SESENTA AÑOS XUNTOS






El próximu 19 de setiembre y dientro de les actividaes dedicaes a la celebración del so 60 aniversariu, l'Agrupación Reija de Llangréu entama una cena-espicha na que van poder participar toos aquellos antiguos componentes o collaboradores qu'asina lo deseyen. 

El llugar escoyíu ye'l  Langrehotel  en La Felguera y aquellos que tean interesaos tienen de ponese en contautu col teléfonu 672 28 18 97 o na dirección de correo reija@reija.as enantes del 12  de setiembre .   

60 AÑOS XUNTOS



12/3/15

NUECHES EN DANZA



A propuesta de xente que trabaya pola recuperación y difusión del folclore tradicional d’Asturies surde la idea d’entamar un nuevu ciclu de «Nueches en Danza» col envís de crear un eventu periódicu col baille y la música tradicional d’Asturies como filu conductor del mesmu.

L’espíritu de les «Nueches en Danza» ye’l disfrutar cola música tradicional al estilu de les fest-noz bretones o seráns gallegos y, sobremanera, el llevar a xente acullá los grupos de baille’l floclor vivu d’Asturies.

Coles nueches en danza non solo se caltién viva la música y el baille popular, sinón que se crea un llugar pa la xuntanza de los vecinos y vecines del pueblu, un llugar onde falar y divertise d’una manera relaxao que, si bien pa muchos pue resultar nueva, fue la manera de relacionase durante bien d’años na sociedá tradicional asturiana.

La primer “Nueche en Danza” d’esti nuevu ciclu va facese esti sábadu 14 de marzu a les 22:30 nel pueblu de La Nueva en Llangréu, una vez finalizáu’l concursu de tonada qu’entama l’Asociación de Vecinos San Luis.


Ellí vamos tar y convidamos a tolos que quieran participar, que s'animen a compartir una nueche en danza colos asistentes.


18/6/14

ENTAMANDO EL BRANU







El domingu 22 a mediu día vamos participar nes actividaes del “Mercáu Llangreanu” na Plaza de La Fundición de La Felguera.




El llunes 23, rondando la media nueche, yá vamos tar no que ye una de les nueses cites añales más clásiques, la Foguera de San Xuan de “El Barriu Urquijo”.


14/6/14

UN DÍA EN BEZANES




Tres un fabulosu día nel pueblu de Bezanes, volvemos a Llangréu con enorme prestu. El verde enclave casín recibiónos dende bien tempranu, y les xentes del mesmu, amosaron el so meyor interés y entrega a la nuesa actuación nes sos fiestes de San Antonio.

Los mozos del pueblu tomaron va unos años les riendes de les fiestes y llograron siguir con una bona tradición del tou apreciada por vecinos y visitantes. Llabor a reconocer y sofitar dende tolos ámbitos.


Dende la nuesa Agrupación damos les gracies al pueblu de Bezanes, a los organizadores de les fiestes y a tolos presentes pola so acoyida. 


26/5/14

MERCÁU TRADICIONAL PAMPIEDRA 2014



Anque'l orbayu de la tarde fixo que los actos acabaren antes de lo pensao, el día en Pampiedra resultó del tou prestosu. Dende antes de mediu día y  hasta que l'agua nos dexó, esfrutamos d'una xornada de bailles y cantares pol Mercáu Tradicional con vistes al verde valle de Samuño. Estimamos a la organización del Mercáu y a los presentes el bon recibimientu del nuesu grupu y  l'enfotu depositáu nel nuesu faer.

6/10/13

FUTURU ASEGURÁU




Ayeri celebróse, dientro de los actos de Tolo d’Asturies 2013, nel enclave del Teatru de La Felguera, el conciertu presentación del cursu 2013-2014 de la Escuela de Música Tradicional REIJA.

Ellí pudimos esfrutar de la música del país de les manos y el bon faer de los más mozos, toos alumnos de la nuesa escuela, que tres casi veinte años de funcionamientu sigue dándonos tantos y tantos bonos momentos.

El recital empezó cola canción asturiana y asina foi como THALIA ufiertónos el so dominiu de la técnica al interpretar LA PAXARINA. De siguío foi la vez de DANI que con  maestría nos allantó col so ROMANCE DE LA NEÑA CLARA interpretáu a la gaita. 

Prosiguió'l conciertu col acordión y la maña una vegada más de NATALIA, que como n'ocasiones anteriores supo sacar lo meyor del mesmu interpretando con soltura la XOTA TORMALEO y la MUÑEIRA CARCAROSA.

MARA foi la siguiente en cautivar al públicu presente cola so interpretación del cantar A ONDE VAS A DAR AGUA y  de siguío, foi de nuevo vez pa la gaita, que IYAN supo remanar con perfección cola melodía de la XOTA BOAL.

Acompañada de la nuesa profesora Fani Moro, INÉS  fixo resonar la pandereta cola soltura que nos tien avezaos p'acompañar cola so peculiar voz un AMIESTU DE SONES TRADICIONALES.

La MUÑEIRA DE BOAL sonó con fuerza de la mano y pulmones  d'HUGO y  de siguío DANI cola so versión de DIME XILGUERÍN PARLERU enllenó el teatru.

PELAYO y ENOL  como pareya de gaita y tambor interpretaron con llimpieza y bon faer la XOTA CALDUEÑU.

El broche final del conciertu púsolu la bandina d'alumnos, con ENOL a la gaita, JAIME al tambor, NATALIA col acordión y DIEGO al bombu.  Xuntos tocaron la XOTA L.LEITARIEGOS y la MUÑEIRA TORMALEO.

Dende l'Agrupación REIJA y n'especial dende la so Escuela de Música Tradicional queremos dar les gracies a los alumnos de la mesma por confiar en nós, a los  nuesos profesores Pablo Carrera , Estefanía Moro, Marisa Valle Roso y Xuan Nel Exposito pol so bon faer toos estos años y al Ayuntamientu de Llangréu pola so collaboración nos actos, según al públicu asistente a los mesmos.



2/10/13

TOLO D'ASTURIES 2013



El 5 d'ochobre cellebrase'l festival Tolo d'Asturies y los alumnos de la escuela de musica tradicional de l'Agrupación d'Etnografía y Folclor Reija de Llangréu van actuar a les 17:30, amas de munches mas coses tol dia. Nun vos lo perder.


NOTA:

Tán preguntándonos si'l sábadu va actuar el grupu de baille de l'Agrupación Reija. 

Quien actúen nel festival TOLO D’ASTURIES 2013 son los alumnos de la nuesa Escuela de Música Tradicional, qu'entama un nuevu cursu estos díes tres casi veinte años dende la so creación, non el grupu de baille. 

Dende equí dámos-yos ánimos deseyando a los asistentes que-yos guste el so bon faer.




24/9/13

VOLVIENDO D'ALCALÁ DE HENARES



El pasáu sábadu 21 de setiembre presentamos na Casa d'Asturies en Alcalá de Henares la nuesa amuesa “El traxe’l país”. L'enclave de les Cases Rexonales nel Antiguu Mataderu de Alcalá foi'l llugar escoyíu y l'amuesa resulto ser un gran ésitu.

Na charra ficimos un percorríu pola hestoria de la vestimienta tradicional, de les materies primes usaes na so ellaboración, les distintes prendes y el so bon vistir. Los presentes esfrutaron del actu, participaron con interesantes entrugues y les felicitaciones repitiéronse a lo llargo de la velada.


Dende la nuesa Agrupación queremos dar les gracies a la Casa d'Asturies de Alcalá de Henares, a la so presidenta Chelo  Prendes y a tolos presentes pol tratu recibíu y pol entusiasmu col que s'acoyó la nuesa amuesa.


17/9/13

DOS BONOS FINES DE SELMANA

Los pasaos díes 8 y 15 de setiembre, la nuesa Agrupación participó una vegada más nos actos de les fiestes del Día de Llangréu n'El Carbayu y de les Xornaes de Folclor del Suroccidente Asturianu en Cangas.



El Día de Langréu acompañamos los actos de la mañana vistiendo'l traxe del país pa siguir la tarde baillando, cantando, faciendo fiesta y romería con ropa actual nuna nueva ocasión, fomentando d'esta miente la participación de los presentes, que s'animaron a compartir l'actividá con nós. Un añu más el nuesu pasu por El Carbayu causónos gran prestu y arguyu, al representar la cultura popular en día tan señaláu pal nuesu conceyu.



Y como n'ocasiones anteriores participamos nes Xornaes de Folclor del Suroccidente Asturianu, compartiendo cola Asociación El Bail.le de Cangas, El grupu Filandón d'Uviéu y el grupu La Corte de Enverniego de Valdés el desfile y los bailles poles cais de Cangas, amás esfrutar de los actos y representaciones del restu de grupos participantes.


Saludamos a los organizadores de estos eventos y dámos-yos les gracies por cuntar una vegada más con nós.


2/7/13

BRANU 2013




La nueche del pasáu domingu 23 de xunu participamos una vegada más na yá tradicional foguera de San Xuan en “El Barriu Urquijo” de La Felguera.

Como n'años anteriores, los vecinos d'El Barriu entamaron tou pa consiguir una bona velada.  La nuesa agrupación amenizó la nueche con dellos bailles y temes musicales y empezó la tradicional danza, como yá vien siendo habitual, al empar que los presentes diben xuniéndose a la mesma al son del romance “¡Ai! Un galán d’esta villa”.

Cola Foguera de San Xuan, empieza la temporada d'actuaciones veraniegues qu'esperamos sían satisfactories y nes que nos gustaría atopavos a toos.

Feliz branu.



15/5/13

FIN DE LANGREOASOCIA 2013




Mientres la xornada d'ayeri participamos col nuesu stand informativu na  IV FERIA DEL COMERCIU Y ASOCIACIONISMO LOCAL “LANGREOASOCIA” nes carpes instalaes na Estación d'Autobuses de La Felguera.

Un añu más la participación de la xente resultó satisfactoria a lo llargo del día.



14/5/13

LANGREOASOCIA 2013



A lo llargo del día de güei vamos tar presentes na IV FERIA DEL COMERCIU Y ASOCIACIONISMO LOCAL “LANGREOASOCIA” nes carpes instalaes na Estación d'Autobuses de La Felguera.





29/4/13

NUEVU BLOG "XUNTANDO SONES"


A lo llargo de casi sesenta años de la vida de l'Agrupación Reija de Llangréu, fueron  numberoses les actuaciones, amueses y talleres sobre música y cultura tradicional asturiana representaos pola mesma.

Güei presentamos “XUNTANDO SONES”, un nuevu blog, nel que vamos amosar retazos de la nuesa hestoria como entidá, actuaciones de les distintes dómines, amueses y esposiciones o cualquier tema sobre cultura tradicional  tratáu pola Agrupación Reija a lo llargo de la so trayectoria.


Convidámosvos a entrar en http://folclorllangreu.blogspot.com.es/ y esperamos vos guste.

4/2/13

ENTAMANDO 2013




Entamamos esti añu col mesmu espíritu que nos acompaña nos nuesos casi sesenta años de vida.

Les amueses en festivales, actuaciones en fiestes y romeríes, charres y talleres de cultura, música y baille tradicional van acompañanos a lo llargo del mesmu y vamos tratar en tolos casos d'espublizar y amosar con arguyu, el folclore d'Asturies.

Presentamos amás con estes llínees la nuesa semeya actual col saludu de tolos que componemos esti grupu.


16/11/12

TALLER DE VESTIMIENTA TRADICIONAL “ALCORDANZA “




Güei tamos colaborando, como yá venimos faciendo nos últimos años, col Colexu Eulalia Álvarez de La Felguera, na celebración del so yá tradicional Amagüestu.

N'ocasiones anteriores realizamos talleres musicales y otres temes de la música y el folclor tradicional d'Asturies.

Nesta xornada, los alumnos y padres del colexu, van poder averase a les maneres de vistir de los nuesos antepasaos, nel TALLER DE VESTIMIENTA TRADICIONAL  “ALCORDANZA “, que yá venimos realizando en distintos colexos d'Asturies, Asociaciones Culturales y Agrupaciones de Folclor de dientro y fora de les nueses fronteres.



El poder tocar les distintes teles, ver el so coloríu en vivu, la esplicación y aclaración de duldes a los presentes, averen, d'una manera entretenío y participativo, a la vida tradicional d'Asturies al traviés de les maneres de vistir.



“ALCORDANZA” ye'l proyectu que la nuesa agrupación lleva desenvolviendo nos últimos venti años p'averar a colectivos, o a la xente polo xeneral, la música y la cultura tradicional d'Asturies al traviés de charres, talleres, esposiciones o publicaciones, realizaes gracies al material y trabayu arrexuntáu mientres los nuesos casi sesenta años d'actividá.

11/10/12

NUEVU CURSU ESCUELA MÚSICA




Entamamos un nuevu cursu de la nuesa Escuela Música Tradicional con un de los meyores profesoraos posibles, Xuan Nel Exposito, Pablo Carrera, Marisa Valle Roso y Estefanía Moro ente otros.

Esta escuela entamó nel añu 1995 al dase cuenta dellos componentes del Grupu Reija , que nel entornu de la agrupación y nel ambiente que se movien había una necesidá de transmitir enseñances sobre instrumentos tradicionales y sobre too no relativo a pareyes de gaita y tambor que supieran tocar pa grupos.

La escuela, nel so entamu, daba clas de curdión, gaita y tambor. Llueu añadióse pandereta, panderu cuadrau, baille, llinguaxe musical y cultura tradicional. Les clases impártense nes aules del Colexu Públicu "Eulalia Álvarez Lorenzo". El Fechu de que les clases seyan nes instalaciones d'un colexu favorez que'l escolin tea una atención personalizada al disponer d'un aula pa él solu.


Una de les ventaxes de la escuela de música tradicional "Reija" de Llangréu ye que la propia escuela facilita l'instrumentu y el material didácticu. D'esta manera, l'escolín nun tendrá que facer un desembolsu importante de perres hasta que él lo decida, en casu de que siga afondando nel so aprendizaxe. Nun hai edá concreta pa entamar, nin por mozu nin por vieyu. La escuela adaptaráse a les posibilidaes del alumnu. Dempués del aprendizaxe individual del instrumentu, ponse en comuña lo aprendío con otros alumnos na modalidá de conxuntos musicales (pareya, bandina, etc.).

Anguañu cunta col so aula itinerante que permite a la mesma ufiertar  el so programa a asociaciones y otres entidaes.

Si tas interesáu infómate de los horarios que en breve saldrán en www.reija.as nel apartáu “ESCUELA MÚSICA”. Por otru lláu pues llamar al 676 69 14 24 o al 620 62 43 27 o al corréu elletrónicu  info@reija.as



10/9/12

XORNAES DE FOLCLOR DEL SUROCCIDENTE “CONCHA DE TRESMONTE”




Los díes 14 y 15 del presente mes de setiembre van tener llugar na villa de Cangas les I XORNAES DE FOLCLOR DEL SUROCCIDENTE “CONCHA DE TRESMONTE”  y la nuesa agrupación va ser una de les participantes na mesma.

Concha Rodríguez Suárez, popularmente conocida como Concha Tresmonte, foi una de les meyores tocadores de panderu y pandereta de la zona suroccidental d'Asturies, una gran fonte d'información dientro del mundu del folclor tradicional y la voz más peculiar de cuantes pudieron escuchase los caberos años nos numberosos festivales y amueses nos que participó.

El programa de los actos va ser el siguiente:

VIENRES 14 NA “BODEGA DEL NARCEA”

18:00. Proyección “Recuerdos en la memoria”
19:30. Filandón “Fálame de Concha”
21:00. Actuación Escuela Municipal de Música Sección Tradicional

SÁBADU 15 POLES CAIS DE CANGAS

11:00 a 14:00: Amuesa de folclor al cargu de:
-              Banda de Gaites de Cangas
-              Agrupación d’Etnografía y Folclor Reija de Llangréu
-              Asociación de Baille y Danza Tradicional Filandón d'Uviéu
-              Grupu de Baille Perendengue de Cangas y Amigos
A partir de les 20:00 música y baille tradicional na Bodega Antón Chicote en Villarín

Ellí vamos tar.

7/9/12

EL CARBAYU 2012



De nuevu avérase'l 8 de setiembre y una vegada más tenemos una cita en El Carbayu pa celebrar la fiesta del Día de Llangréu.




La nuesa Agrupación va participar nos actos de la mañana y a la fin de la mesma va ufiertar un repertoriu de bailles y dances tradicionales a los asistentes.





Tres la comida romera, y yá vistíos al usu actual, vamos baillar, vamos cantar y vamos compartir con aquellos que s'animen, bailles a lo suelto, a lo garrao, corros y xotes pola redolada de la fiesta.




Esta esperiencia, que yá venimos realizando fai más de seis años, yenos del tou prestosa y colla queremos convidar a tolos presentes a participar de la música y bailles populares, reivindicando la so interpretación como parte viva y actual del nuesu folclor.

Asina que animamos a tolos que lo deseyen a xuntase al son de la música d'Asturies el sábadu 8 de setiembre en El Carbayu.

Ellí vamos tar.

20/8/12

NAVELGAS 2012



Un añu más, y como vien siendo habitual, l'últimu domingu del mes d'agostu, el nuesu grupu va desplazase a la localidá de Navelgas – Tinéu a participar na fiesta del “Día de los Pueblos d'Asturies”.

Desque La Felguera viérase homenaxada yá na segunda edición, l'Agrupación Reija collabora vivamente nos actos festivos.

Cada añu, arropaos polos homenaxaos de les ediciones anteriores, entrégase la “Palomba de la Fraternidá" a una nueva localidá, nesta ocasión La Pola Llaviana.

Tamién faise entrega de los galardones "Choscu d'Oru" a persones, sociedaes y entidaes que promueven, sofiten y defenden a Asturies, y l'Arándanu de Plata” a grupos, sociedaes, entidaes y persones físiques ya intérpretes musicales, que promueven y sofiten la fiesta del Día de los Pueblos d'Asturies, según el folclor, la música asturiana nes sos distintes facetes, la recuperación de tradiciones y la gastronomía asturiana. La nuesa Agrupación foi la tercera en recibilo na edición del añu 1991. Nesta edición serán agraciaos con estos galardones l'Asociación Empresa Muyer, d'Asturies y la Confradía de San Timoteo, de L.luarca.

Nesti día, el pueblu de Navelgas da la bienvenida a les xentes de tolos pueblos que s'averen a esfrutar de los grupos de folclore, les charangues, les bandes de música y les más variaes gastronomíes regaes con sidra y vinu de peyeyu.

Ellí vamos tar.

20/6/12

SAN XUAN 2012





Un añu más, y yá van casi venti, vamos participar na Foguera de San Xuan nel Barriu Urquijo de La Felguera.

Nesta ocasión vamos empezar el vienres 22 a les 8:30 de la tarde realizando un taller de La Danza colos vecinos de El Barriu y toos aquellos que quieren participar. Vamos Tratar de dar una güeyada xeneral a les maneres d'executar La Danza n'Asturies y sobremanera el tratar d'enseñar a los asistentes a danciar col romance de ¡Ai, Un galán d’esta villa! Como lo fadremos yá toos xuntos a otru día na nueche sanxuanera.



A partir de les 23:00 del sábadu 23 vamos poder esfrutar de La Foguera y Danza de San Xuan en El Barriu Urquijo de La Felguera. Ellí vamos tar.

21/5/12

DESPIDIÉNDOSE DE L'ASCENSIÓN




Dempués de tres díes d'intensa actividá, concluyimos la nuesa estancia na Llosa d'Uviéu mientres la Feria de La Acensión 2012.

La nuesa esposición y amuesa artesanal “Alcordanza: El Traxe Tradicional n’Asturies” goció mientres estos trés díes, de la presencia de de miles de persones que visitaron les instalaciones de la carpa habilitada pol Conceyu d'Uviéu.

A lo llargo de too la fin de selmana pudo esfrutase de la esposición de vestimienta tradicional ambientada  con música, videos y material gráficu de los trabayos divulgativos de la nuesa agrupación. Per otru llau los visitantes pudieron esfrutar d'amueses en vivu de filáu de llana, tintes naturales, trabayos en telar d'altu lizo, cestería y fabricación de madreñes. Los más pequenos pudieron prestase nos talleres de recortables de ropa y trabayando nos pequenos telares de mano.

Nun faltó la música, el baille y les  costumes populares. Les actuaciones de Marisa Valle Roso, Pablo Carrera, los alumnos de la Escuela de Música Tradicional Reija y los  monólogos de Veníu Braga “El Mundial” de La Felguera, qu'a les sos más d'ochenta años cautivó les sorrises de los presentes, amenizaron les hores de feria. Les xentes de Reija interpretaron mientres toles xornaes numberosos bailles a la manera tradicional.  

8/5/12

REIJA EN L'ASCENSIÓN 2012


El 18, 19 y 20 de mayu va celebrase n'Uviéu la Feria de L'Ascensión. Mientres esos trés díes, La Llosa sobre la estación de RENFE, va acoyer de nuevu, unu de los certames de cultura asturiana de mayor raigón.

Nes distintes carpes podrá esfrutase de distintos aspeutos de la cultura, música y tradición d'Asturies, y l'Agrupación Reija de Llangréu, va volver tres unos años d'ausencia a tar presente cola so amuesa “ALCORDANZA: EL TRAXE TRADICIONAL N’ASTURIES”.

El gran fenómenu de la revolución industrial del sieglu XIX y la primer metá del sieglu XX causa n'Asturies un enorme cambéu de vida tantu no económico, como no social y cultural. Les maneres de vistir tradicionales entren a la nueva dómina y amodo fueron sumiendose.

Por esi motivu “L’Agrupación d’Etnografía y Folclor Reija de Llangréu” ufierta nesta esposición una pequena repasada poles maneres de vistir de les nueses xentes hasta la entrada del sieglu XX.

Na amuesa estremamos los distintos tipos del vistir conforme al usu y posición social. Asina cuntamos con traxes de fiesta, de diariu, de ceremonia, del monte y dexando tamién un apartáu pa la indumentaria de transición ente l'usu tradicional y les nueves modes. Trátase de reconstrucciones fieles realizaes con materiales orixinales o d'idéntica factura qu'estos.

Acompañamos la mesma con amueses de tinte tradicional y artesanía en vivu, música, bailles tradicionales, y talleres pa los más pequenos.

7/5/12

DESPIDÍMONOS DE TOLO D’ASTURIES 2012


Un añu más ponemos fin a l’amuesa TOLO D’ASTURIES. 

L’Agrupación Reija participó de forma activa a lo llargo de la mesma. Amás de ofrecer el so repertoriu de bailles y presentar la so esposición sobre indumentaria, ALCORDANZA: EL TRAXE TRADICIONAL N’ASTURIES, dalgunu de los alumnos de la Escuela de Música Tradicional de l’Agrupación, pudo amosar al públicu presente la so evolución na interpretación de pieces musicales populares.

L'arribación de públicu a lo llargo de la fin de selmana y les visites a la parte espositiva fueron totalmente satisfactories.

Dende l’Agrupación Reija queremos estimar a tolos asistentes, lo mesmo que a los participantes nes amueses y a los collaboradores, la so presencia nel eventu.

29/4/12

TOLO D'ASTURIES 2012



Un añu más, nel  Recintu Ferial Estación d'Autobuses de Llangréu, los días 5 y 6 de mayu, va celebrase en La Felguera, la feria “Tolo d’Asturies”, qu'anguaño llega a la so sesta edición.

La cultura y música tradicional d'Asturies van ser una vegada más les protagonistes absolutes.

L’Agrupación Reija participara na organización de la mesma amás de presentar la so esposición “Alcordanza: El Traxe Tradicional n’Asturies” y l'amuesa la so “Escuela de Música Tradicional”.

De siguío puede consultase el programa de la mesma, convidando a toos a participar de los actos ufiertaos.

Sábadu 5 mayu
12:00 hores     APERTURA MUESTRA CULTURAL TOLO D’ASTURIES
12:00 hores     BANDA GAITES CONCEYU LLANGRÉU
13:00 hores     GRAN SESIÓN VERMÚ D’ASTURIANADA
                        (Emisión pela TPA nel programa Sones)
18:00 hores     MUESTRA DEPORTE TRADICIONAL
22:00 hores     Conciertu
LLARIEGU 100% DIRECTO
ASINA SUENA LLANGRÉU (DUERNA + MARISA VALLE ROSO + BANDA GAITES CONCEYU LLANGRÉU + ARTISTES CONVIDAOS)
SPANTA LA XENTE

Tol día:            Esposición Vistimienta Tradicional Asociación d’Etnografía y Folclor Reija de Llangréu
Folixa y animación pa toos y toes con grupos de baille y música tradicional
Talleres pa neñes y neños

Domingu 6 mayu
12:30 hores     MUESTRA DEPORTE TRADICIONAL
13:15 hores     BANDA MÚSICA CONCEYU LLANGRÉU
17:00 hores     MUESTRA CORAL DE LLANGRÉU
18:30 hores     ESPECTÁCULU (HERBAMORA + ESCUELA MÚSICA TRADICIONAL REIJA DE LLANGRÉU)
20:30 hores     CLAUSURA

Tol día:            Esposición Vistimienta Tradicional Asociación d’Etnografía y Folclor Reija de Llangréu
Folixa y animación pa toos y toes con grupos de baille y música tradicional
Talleres pa neñes y neños 

9/4/12

VOLVIENDO DE CIUDAD RODRIGO

Ciudad Rodrigo recibió con calor la participación de l’Agrupación Reija de Llangréu nel Festival de Folclor de la XXXIII edición de La Fiesta de La Charrada.

Compartimos escenariu con grupos de la comarca, faciendo una amuesa del folclor d’Asturies. Los asistentes participaron col grupu Reija nel baille popular que tolos grupos de folclor y los tamborileros y dulzaineros improvisamos nel centru de la Plaza Mayor al final de la fiesta.

Agradecemos a la organización y a les xentes de Ciudad Rodrigo l'enfotu depositáu na nuesa participación.

Nel siguiente enllace alcontramos más información:

http://ciudadrodrigoaldia.es/2012/04/07/mucha-animacion-en-la-xxxiii-fiesta-de-la-charrada/

Foto: Mondrián (Salamanca)

4/4/12

XXXIII FIESTA DE LA CHARRADA EN CIUDAD RODRIGO - SALAMANCA


Esti fin de selmana del 7 y 8 d’abril cellébrase en Ciudad Rodrigo – Salamanca la “XXXIII FIESTA DE LA CHARRADA” onde el folclor y la música tradicional tienen un especial protagonismu. L’Agrupación Reija taremos participando nel FESTIVAL DE FOLCLOR y disfrutando de los festexos.
EL PROGRAMA DE LA MAÑANA
11:30 h. Tamborileros y dulzaineros de Ciudad Rodrigo y comarca.

13:00 h. Actuación en Plaza Mayor:

Tamborileros.
Grupu Infantil de la Asociación El Botón Charro de Miróbriga.
Grupu de ASPRODES.
Grupu del Centro de Día de Personas Mayores de Ciudad Rodrigo.
Dulzaineros: “Escuela de tamborileros de Macotera y Villamayor”
Grupu folclórico infantil “Jálama”. El Payo

EL PROGRAMA DE LA TARDE

18:00 h. Festival de Música Tradicional en la Plaza Mayor, de Grupos Folclóricos:

Grupu Nuñomoral
Grupu Sierra de Francia.
Asociación El Botón Charro de Miróbriga.

Entrega del Premiu Encina Charra a: D. NINO SÁNCHEZ.

Grupu Zona de la Huebra (Subcomarca del Campo Charro)
Grupu "el Fandangu" de Robleda
Agrupación d’Etnografía y Folclor REIJA de Llangréu - Asturies

20:00 h. Baille popular