Pieslle de la feria Tolo d'Asturies

Esti domingu echose el pieslle a la primer feria "Tolo d'Asturies" de Llangréu. Fueron tres díes que ficieron xusticia al nome que se-y pusu al eventu, ya que tantu la meteoroloxía como la amuesa cultural que taba programada nel cartel, fueron representantes cimeros, d'esi ampliu conceutu qu'abarca la pallabra Asturies. Los más de milenta metros de carpes que s'habilitaron pa resguardecese del temporal, abellugaron un mercáu tradicional d'artesanos, talleres y actividaes pa neños y neñes, amueses didautiques, actuaciones de bandes de gaites, tonada, grupos de baille, bandines, y cuentacuentos.

La xente de Llangréu, asina como d'otres partes de la xeografía asturiana y dalgún del restu l'estáu español, planto-y cara a la borrina y l'orbayu y dexose ver poles carpes de la Estación d'Autobuses, aumentando la asistencia del públicu conforme foi pasando la fin de selmana y llegando a xuntase el mayor númberu de xente conicidiendo colos conciertos qu'entamaron sobre les diez de la nueche.

La primer nueche, Llangréu tornó a danciar en corru en tornu a les dances entonáes por Tuenda y lluéu glayó y bailló hasta bien entrada la nueche, gracies a la música de Xuacu Amieva. El sábadu actuó el grupu infantil Xentiquina, que dexó a tola carpa enamorada de les sos voces y los sos bailles, con especial enfotu nel so rock and roll. Darréu compartieron escenariu el músicu poliinstrumentista Héctor Braga, que deleitó a los asistentes con un conciertu didáuticu y dexó a más d'un ablucáu al cantar tonada, acompañándose él mesmu a la gaita y Armando Valdés que fizo una charra col envís de dar a conocer el traxe'l país del home y la muyer.

Al cayer la nueche, los ritmos fusionaos d'Anabel Santiago punsieron a la xente sollerte, indicando que la nueche, amás de prieta y húmeda, diba a ser llarga y folixera. Los hermanos Tejedor piesllaron la xornada con un conciertu bien prestosu onde tuvieron que salir delles vegaes al escenariu por mor de la insistencia del públicu, finando col cantar del chalaneru que tan míticu ye en La Cuenca del Nalón y puso un broche d'oru a la xornada al xuntase'l públicu a andechar a los músicos cola lletra d'esti perconocíu cantar.

El domingu, la tonada del Che de Cabaños y los hermanos Roso, La Banda Gaites del Conceyu Llangréu, La Bandina Los Llanzones y el cuentacuentos Carlos Alba "Cellero", acompañaron a los asistentes hasta la clausura de la “I Muestra Cultural TOLO D’ASTURIES de LLANGREU”.

Esperamos y prestaríanos que se pueda repetir.